ການຮ້ອງຟ້ອງຄະດີຕໍ່ກັບລັດຖະບານລາວກໍາລັງຖືກນໍາຂຶ້ນສູ່ສູນແກ້ໄຂຂໍ້ຂັດແຍ້ງສາກົນທາງດ້ານການລົງທຶນຂອງທະນາຄານໂລກແມ່ນສາມາດທີ່ຈະເຮັດໃຫ້ປະເທດເສຍຊື່ສຽງ, ມີຜົນກະທົບຕໍ່ການລົງທຶນຂອງຕ່າງປະເທດໃນຕໍ່ໜ້າ.
ໃນຕົ້ນເດືອນສິງຫາ 2012, ບໍລິສັດຖືຫຸ້ນລາວທີ່ເປັນຂອງຈີນ ແລະສາຂາຂອງບໍລິສັດຄື: ບໍລິສັດ ລົງທຶນສະນໍາ (Sanum Investments) ໄດ້ຍື່ນຄໍາຮ້ອງຟ້ອງຢູ່ທີ່ສູນແກ້ໄຂຂໍ້ຂັດແຍ້ງສາກົນທາງດ້ານການລົງທຶນ (ICSID) ຂອງທະນາຄານໂລກ ເພື່ອຢຸດຕິການທີ່ລັດຖະບານຈະຍຶດຊັບສິນຂອງບໍລິສັດມູນຄ່າ 400 ລ້ານໂດລາ. ການເຄື່ອນໄຫວນີ້ແມ່ນຈະມີຜົນກະທົບຕໍ່ກັບ ສປປ ລາວ ໃນການສະໝັກເຂົ້າເປັນສະມາຊິກຂອງອົງການ ການຄ້າໂລກ (WTO) ແລະເຮັດໃຫ້ເກີດມີຮອຍແປ້ວຕໍ່ກັບຊື່ສຽງຂອງຕົນເອງຢູ່ໃນເວທີທຸລະກິດສາກົນ.
“ປະມານປີເຄິ່ງທີ່ຜ່ານມາ ພວກເຮົາໄດ້ເລີ່ມມີສອງສາມບັນຫາເກີດຂຶ້ນ [ຢູ່ໃນ ສປປ ລາວ] ແລະມັນໄດ້ເລີ່ມຊຸດໂຊມລົງຕັ້ງແຕ່ນັ້ນມາ,” ນີ້ແມ່ນຄໍາກ່າວຂອງທ່ານ ໂຈດີ ຈໍດາລ (Jody Jordahl), ປະທານຂອງບໍລິສັດ ສະນໍາ (Sanum). “ເມື່ອບໍ່ດົນມານີ້ພວກເຮົາເກືອບຈະຖືກໄລ່ອອກຈາກຄວາມເປັນເຈົ້າຂອງ [ບ່ອນກາຊິໂນທ່ານາແລ້ງ] ຢູ່ທີ່ຂົວມິດຕະພາບນະຄອນຫຼວງວຽງຈັນ, ແລະໂຄງການດັ່ງກ່າວແມ່ນໄດ້ລົງທຶນໄປ 25 ໂດລາ. ພວກເຮົາ [ຍັງ] ເສຍການສໍາປະທານ ແລະການອະນຸຍາດຫຼາຍອັນອີກ. ໂຄງການໃຫຍ່ທີ່ສຸດຮອດທຸກມື້ນີ້ຄື: ຣີສອດຄົບວົງຈອນສະຫວັນເວກັດ (Savan Vegas) ແມ່ນຢູ່ໃນພາວະການສ່ຽງໄພຈາກກະຊວງການເງິນ ແລະກົມພາສີ, ດັ່ງນັ້ນ ພວກເຮົາຈິ່ງເຫັນວ່າມັນອາດຈະຖືກປິດລົງໄດ້ໃນມື້ໃດມື້ໜຶ່ງ.”
ການອ້າງເຖິງຄວາມຫຼົ້ມເຫຼວໂດຍລັດຖະບານເພື່ອສົ່ງເສີມສະພາບທາງດ້ານເສດຖະກິດ ແລະກົດໝາຍທີ່ໝັ້ນຄົງ, ບໍລິສັດສະນໍາໄດ້ຕໍ່ສູ້ວ່າ ຂະແໜງຍຸຕິທໍາ ແລະອົງການທາງດ້ານພາສີຢູ່ໃນ ສປປ ລາວ ໄດ້ນໍາໃຊ້ຂັ້ນຕອນຕ່າງໆ ເພື່ອເຮັດໃຫ້ບໍລິສັດຕ່າງໆທີ່ຄອບຄົວຂອງຄົນລາວມີສ່ວນເຊື່ອມໂຍງເປັນເຈົ້າຂອງນັ້ນສາມາດເຂົ້າຄວບຄຸມໂຄງການຂອງສະນໍາ. ຕະຫຼອດໄລຍະເວລາຫຼາຍກວ່າຫ້າປີນັ້ນ, ບໍລິສັດສະນໍາໄດ້ລົງທຶນໄປເປັນຊັບສິນຢູ່ໃນປະເທດລາວເກີນກວ່າ 85 ໂດລາ, ເຊິ່ງປະຈຸບັນມີມູນຄ່າ 400 ລ້ານໂດລາ. ການຮ້ອງຟ້ອງເພື່ອໃຫ້ມີການໄກ່ເກ່ຍຢູ່ທີ່ ICSID ແມ່ນໄດ້ເປັນການຕໍ່ສູ້ຂອງບໍລິສັດສະນໍາ ເພື່ອບໍ່ໃຫ້ລັດຖະບານຍຶດເອົາຊັບສິນຂອງຕົນເອງ.
ທ່ານ ຈໍດາລ ກ່າວວ່າ “ພວກເຮົາໄດ້ປະຕິບັດຕາມທຸກວິທີທາງທີ່ເປັນໄປໄດ້ຢູ່ໃນປະເທດ”. ຄະດີຂອງບໍລິສັດເມື່ອບໍ່ດົນມານີ້ແມ່ນທາງບໍລິສັດສະນໍາໄດ້ຖືກຮ້ອງຟ້ອງເຂົ້າມາພິຈາລະນາຄະດີໂດຍກຸ່ມບໍລິສັດ ເອັສ ທີ (ST Group) ທີ່ເປັນຫຸ້ນສ່ວນພາຍໃນ ດ້ວຍການແຈ້ງໃຫ້ຮູ້ພາຍໃນ 48 ຊົ່ວໂມງ. “ພວກເຮົາໄດ້ຮັບແຈ້ງໃນເວລາໜ້ອຍກວ່າ 48 ຊົ່ວໂມງ ກ່ອນການພິຈາລະນາສືບສວນ [ຄັ້ງໜຶ່ງ], ເຊິ່ງໄດ້ດໍາເນີນການເມື່ອສອງສາມອາທິດຜ່ານມາ,” ທ່ານຈໍດາລ ອະທິບາຍເພີ່ມ.
“[ພວກເຮົາມີ] ເວລາໜ້ອຍກວ່າ 1 ຊົ່ວໂມງ ເພື່ອນໍາສະເໜີຄະດີ [ແລະ] ພະຍານຂອງພວກເຮົາ. ຜູ້ພິພາກສາໃຫ້ການພິຈາລະນາໃນເວລາໜ້ອຍກວ່າເຄິ່ງຊົ່ວໂມງ, ແລະ [ເຂົາເຈົ້າ] ມາພ້ອມກັບບົດລາຍງານທີ່ໄດ້ກະກຽມມາກ່ອນຈໍານວນ 8 ໜ້າ ເຊິ່ງຕັດສິນຄວາມເປັນເຈົ້າຂອງໂຄງການທັງໝົດຂອງພວກເຮົາໃຫ້ກັບກຸ່ມບໍລິສັດ ເອັສ ທີ (ST Group). ມີແຕ່ພວກເຮົາຜູ້ດຽວເທົ່ານັ້ນທີ່ໄດ້ລົງທຶນໄປ 25 ລ້ານໂດລາໃນໂຄງການນັ້ນ, ແລະບໍລິສັດຫຸ້ນສ່ວນຂອງພວກເຮົາ [ບໍລິສັດ ST Group] ແມ່ນບໍ່ໄດ້ລົງທຶນອັນໃດເລີຍ. ລັດຖະບານຍັງເຮັດການປັບໄໝພວກເຮົາຕໍ່ກັບຄ່າເສຍຫາຍເປັນການລົງໂທດອີກ 5 ລ້ານໂດລາ, ແລະໃນຕອນທ້າຍຂອງການພິຈາລະນາຄະດີຍັງແຈ້ງໃຫ້ພວກເຮົາຮູ້ວ່າຈະຍຶດເອົາທຸກບັນຊີຂອງບໍລິສັດສະນໍາຢູ່ໃນປະເທດ. [ແຕ່ແນວໃດກໍ່ຕາມ] ແຈ້ງການຍຶດແມ່ນໄດ້ເຊັນໄວ້ສອງວັນກ່ອນການພິຈາລະນາສືບສວນຄະດີ. ດັ່ງນັ້ນ ໂອກາດທີ່ມີຄວາມເປັນທໍາ ແລະເປັນກາງໃນການພິຈາລະນາຄະດີຈິ່ງມີໜ້ອຍທີ່ສຸດ.”
ການດໍາເນີນການຂອງລັດຖະບານທີ່ຈະຍຶດເອົາຊັບສິນຂອງບໍລິສັດສະນໍາອາດຈະມີຜົນກະທົບຮ້າຍແຮງຕໍ່ການສະໝັກເຂົ້າເປັນສະມາຊິກອົງການ ການຄ້າໂລກ (WTO), ແລະມັນຍັງຈະເຮັດໃຫ້ເກີດການວິພາກວິຈາກຈາກເວທີທຸລະກິດສາກົນ. ບໍລິສັດສະນໍາຈັດການໂຄງການໂຮງແຮມ ແລະກາຊິໂນຫຼາຍບ່ອນທົ່ວປະເທດລາວ, ແລະກໍ່ຍັງເຫັນວ່າ ການກະທໍາຂອງລັດຖະບານແມ່ນເປັນການລະເມີດຕໍ່ສົນທິສັນຍາການລົງທຶນສາກົນທີ່ໄດ້ເຊັນພາຍໃຕ້ການຄຸ້ມຄອງຂອງ ICSID.
ທ່ານ ຈໍດາລ ກ່າວວ່າ “ບໍລິສັດສະນໍາແມ່ນເປັນນາຍຈ້າງໃຫຍ່ທີ່ສຸດຢູ່ໃນປະເທດ”. “ພວກເຮົາ [ຈ້າງ] ຄົນລາວຫຼາຍກວ່າ 2000 ຄົນ [ແລະ] ພວກເຮົາໄດ້ຝຶກລູກຈ້າງຫຼາຍກວ່າ 10,000 ຄົນ. ພວກເຮົາໄດ້ຈ່າຍເງິນຫຼາຍກວ່າ 7 ລ້ານໂດລາເປັນຄ່າພາສີ ແລະຄ່າທໍານຽມການເຂົ້າເມືອງ, ແລະພວກເຮົາຍັງໄດ້ສ້າງລາຍຮັບເປັນຫຼາຍສິບລ້ານໂດລາໃຫ້ກັບຄົນລາວ ແລະລາຍຮັບພາສີຂອງລັດຖະບານ. ພວກເຮົາໄດ້ເຮັດສິ່ງທີ່ດີຫຼາຍຢ່າງໃຫ້ກັບປະເທດ ແລະຮູ້ສຶກວ່າສິ່ງທັງໝົດເຫຼົ່ານັ້ນແມ່ນບໍ່ມີປະໂຫຍດອັນໃດເລີຍ. ຖ້າອັນນີ້ເປັນວິທີການທີ່ລັດຖະບານໃຫ້ກຽດເຄົາລົບຕໍ່ກັບຄໍາໝັ້ນສັນຍາຂອງຕົນເອງແລ້ວ, ເຂົາເຈົ້າອາດຈະບໍ່ທັນພ້ອມທີ່ຈະເຂົ້າເປັນສະມາຊິກຂອງອົງການ ການຄ້າໂລກ (WTO) ຫຼືການທີ່ຈະເຂົ້າໄປສູ່ເວທີຂະໜາດໃຫຍ່ຂອງໂລກ.”
ທາງ fDi ໄດ້ພະຍາມຕິດຕໍ່ຟັງຄໍາຄິດເຫັນຂອງລັດຖະບານລາວແລ້ວ, ແຕ່ບໍ່ໄດ້ຄໍາຕອບຫຍັງ.
ທ່ານ ບຸນຍັງ ວໍລະຈິດ
♥ 22258
ซอยกันแงงเด้อค่ะ คนลาวบ้านเฮากะซอยกัน จั๊งสิได้มีอยู่มีกินดีขึ่น อย่าให้เขาโกงเขากินคักหลาย
เบิ๊งกันเด้อค่าเด้อ หอมกันแพงกัน